കണക്ക്

ഞാന്‍ ജയില്‍ മോചിതനാകുമ്പോള്‍
78വയസ്സുള്ള രോഗിയായിരുന്നു
മുപ്പതാം പിറന്നാള്‍ ദിനത്തിലായിരുന്നു
കാരാഗൃഹ വാസത്തിന്റെ തുടക്കം
നേതാവിന്റെ പുച്ചയെകൊന്നതിന്
അഞ്ചു വര്‍ഷം.
ഓഫിസില്‍ ഒരു കണക്ക് തെറ്റിച്ചതിന്
പത്തു വര്‍ഷം.
ജയിലറുടെ ഭാര്യയെ സ്വപ്നം
കണ്ടതിന് പത്തു വര്‍ഷം
മൂന്നു ആത്മഹത്യാ ശ്രമത്തിന്
മറ്റൊരു പതിനഞ്ചു വര്‍ഷം
മൊത്തം നാല്‍പ്പതു വര്‍ഷം
പിന്നെയെട്ടു വര്‍ഷം
അധികമായത്്
ജയിലുദ്യോഗസ്ഥരുടെ
കണക്കില്‍ വന്ന പിശകായിരുന്നു.
കണക്കറിയാത്ത ഒരു
തടവുകാരാനായിരുന്നു
എന്റെ തടവിന്റെ കണക്കു കൂട്ടിയത്
അയാള്‍ കണക്കു പുസ്തകവുമായി
ആത്മഹത്യ ചെയ്തതിനാല്‍
എന്റെ കണക്കുകള്‍ക്ക്
കണക്കില്ലാതായി......

ചെഗുവേര

ചെ,
ഇപ്പോള്‍
ഒരു നൂറ്റാണ്ടകന്നു
പായുന്നു.
വെടിമരുന്നറക്ക്
തീയെറിഞ്ഞോടുന്ന
നരവര്‍ഗ്ഗജാരന്റെ
ഭീതിപോലെ
ചെ,
നീ പനിപോലെ
മെല്ലെ
പടി കേറി വന്നിട്ട്
പോരിന്റെ രോഷം
വിതച്ച രാത്രിയില്‍
ബൊളീവിയയില്‍
ശോണ മേഖങ്ങള്‍
കൂടുകെട്ടി.
ചെ,
നീയാദ്യം
നുള്ളി നോവിക്കുന്ന
കുട്ടിയായി
പിന്നെ
കുത്തി നോവിക്കുന്ന
കത്തിയായി

ചെ,
നിന്റെ നിലവിളിയില്‍
പുരുഷന്‍
ആദ്യമായി
പേറ്റു നോവറിഞ്ഞു.
ചെ,
നിന്റെ ചിരിയില്‍
അറ്റക്കാമയില്‍
ചുവന്ന പൂക്കള്‍ വിരിഞ്ഞു.
ചെ,
നിന്റെ നെഞ്ചില്‍
ലാറ്റിനമേരിക്കല്‍
കളിക്കളങ്ങളിലെ
ആരവങ്ങള്‍ പൂത്തുലഞ്ഞു

ചെ,
നിന്റെ ചിന്തകളില്‍
കുതറിയോടിയ
കാളക്കൂറ്റന്‍മാര്‍
കാലങ്ങളുടെ കാതുകളിലേക്ക്്്
മുക്രയിട്ടു
ചെ,
നീ ഉണരാനായി
മാത്രം ശവപ്പെട്ടിയില്‍
നീണ്ടു കിടന്നു.
ചെ,
അവരുടെ
വെടിയുണ്ടകള്‍
ബൊളീവിയയുടെ
കൃഷിയിടം കിളച്ചു.
ചെ,
നീ കാരുണ്യവാനായ
ഭിഷഗ്വരന്‍
നിന്റെ ശസ്ര്തം ഒരു
ശാസ്ര്തം

അവിടെ മഞ്ഞു വീണ്
തണുത്ത്
മഴ വീണ് നനഞ്ഞ്
കറ വീണ് ക്ലാവ് പിടിച്ച്
ദയയുടെ സ്മൃതി നാശത്തില്‍
ശ്വാസം പിടഞ്ഞു.....
ചെ.
കരയരുത്
ചരിത്രം തിമിരത്തിന്റെ
കംബളം വിരിച്ചു
കിടന്നു കഴിഞ്ഞു.
കള്ളയുറക്കത്തിന്റെ
പൊരുളറിയാതെ
നീ ശവപ്പെട്ടിയില്‍
കിടക്കുക...........

രാജവെമ്പാല

രാജവെമ്പാല

പത്തിമടക്കി
തണുത്ത ഹൃത്തടങ്ങളില്‍
വളഞ്ഞു പുളഞ്ഞു
കൂടിപ്പിരിഞ്ഞു കിടക്കുന്നു
തിളങ്ങും കരിവരകള്‍
പുതച്ച് രാജവെമ്പാല.

അടയാത്ത കണ്ണുകളില്‍
ചുരമാന്തും കടല്‍ച്ചുഴി
പകയുടെ നീലവിഷം
നീന്തും തടാകം
ഭയംജലജീവിയായി
വാലിട്ടിളക്കുന്നു

നിന്റെ ദര്‍ശനം
കൊടും ദംശനം
നിന്റെ സ്പര്‍ശനം
വിഷ വര്‍ഷണം.
ഇര പോല്‍ പ്രതികാരം
വിഴുങ്ങിയലസമായ്
വീഷമാറ് വീര്‍പ്പു മുട്ടിക്കുമൊരു
പൂതനാമോഹം പോല്‍
നീ രാജവെമ്പാല,
കാത്തിരിക്കുന്നതാരെ
മൃതി ദ്രാവകത്തില്‍
നീല ഛഷകവുമായ്
ഇരുട്ടിന്‍
നീലപ്പുതപ്പിനടിയില്‍
ഒടുക്കത്തെ കാത്തിരിപ്പിന്റെ
നിലക്കാത്ത നീലദാഹമായ്
നീ രാജവെമ്പാല

24.9.10

നാട്ടുകാര്യം

ചോര വാര്‍ന്നു മരിച്ചോരമ്മയുടെ
മടി്ത്തട്ടിലുറങ്ങുന്ന
കുഞ്ഞിനെപ്പോലെ ഇറാക്ക്.
ഭ്രാന്താലയത്തിന്റെ തുരുമ്പിച്ച
കമ്പിയില്‍ കെട്ടിയിട്ട മുഴുഭ്രാന്തനെ
പ്പോലെയഫ്ഘാനിസ്ഥാന്‍.
അച്ഛനെക്കൊന്ന മകനെയൊളിപ്പിക്കാന്‍
വെമ്പുമമ്മയുടെ ദൂരൂഹമൗനം
പോലെ വടക്കന്‍ കൊറിയ.
ഉത്‌സവപ്പറമ്പിലലഞ്ഞു തിരിയും
കുടിയന്‍ മധ്യവയസ്‌കനെപ്പോലെയിന്ത്യ.
വിറ്റു തീര്‍ന്ന മാനം പൊന്നു
പെട്ടിയിലട്ടിവെക്കുന്ന പെണ്ണിന്റെ
കൗതുകച്ചിരിയുമായി റഷ്യ.
ലായത്തിന്റെയിരുട്ടില്‍ തുരഗവേഗം
മറന്നു പോം
യുദ്ധക്കുതിരയെപ്പോലെ തിബത്ത്്.
വെട്ടിക്കൊല നടന്ന വീട്ടുമുറ്റം
തൂത്തുവൃത്തിയാക്കുന്ന
വീട്ടമ്മയെപ്പോലെ ശ്രിലങ്ക.
തിങ്ങിനിറഞ്ഞ പ്ലാറ്റു ഫോമില
ന്തിയുറങ്ങാന്‍ നടക്കും ഗതികെട്ട
യാത്രക്കാരനെപ്പോലെ ബംഗ്ഌദേശ.
മദ്രസക്കുള്ളില്‍ മനസ്സിന് സമനില
തെറ്റിനടക്കുമുസ്താദിനെപ്പോലെ
പാക്കിസ്താന്‍.
ഗോള്‍ വീണ ഗ്രൗണ്ടിലെയാരവം
പോലെ തെക്കന്‍ കൊറിയ.
ജയില്‍ വളപ്പിലെ നാടകശാലയില്‍
വീഞ്ഞുമോന്തിച്ചിന്തിച്ചിരിക്കുന്ന
തടവുകാരനെപ്പോലെ ചൈന.
പഞ്ചനക്ഷത്ര ഹോട്ടലിന്റെയിരുണ്ട
ഇടനാഴിയില്‍
അര്‍ധരാത്രിയില്‍ മയങ്ങിനടക്കും
തന്റേടിപ്പെണ്ണിനെപ്പോലെ തായ്‌ലാന്റ
ദൂരിതം പിടിച്ച കൊ്ല്ലന്റെ
കുടിലിന് മുന്നില്‍ കെട്ടിയിട്ടോരെലുമ്പന്‍
പട്ടിയെപ്പോലെ
വൃത്തിഹീനനായി സുഡാന്‍.
കാമുകിയുടെ നാഭിച്ചുഴിയില്‍ വിണ
തേന്‍ നക്കിയെടുക്കും കാമുകനെപ്പോലെ
സ്വിറ്റ്‌സര്‍ലാന്റ്.
മതപാഠശാലയിലെ പൊന്‍താളലങ്കരി്ച്ച
വേദപുസ്തകം പോലെ സൗദിഅറേബിയ.
കൂമ്പടഞ്ഞ കൂറ്റന്‍ തെങ്ങില്‍ നിന്നും
നിരാശ കൊ്ത്തിപ്പറന്നകലും
കുരുവിക്കൂട്ടംപോലെ ക്യൂബ.
എത്ര രാജ്യങ്ങളെത്ര വൈവീധ്യ
വര്‍ത്തമാനങ്ങള്‍..
ഒത്തു നോക്കിയാല്‍ നാമെത്രയോ
ഭാഗ്യവാന്‍മാര്‍
കുത്തിനോവിക്കും രൂക്ഷ വേദനാ
സൂചികളെത്രയുണ്ടെങ്കിലും
ചിത്ത വെളിച്ചത്തിലോടിക്കളിക്കുവാന്‍
ഇത്തരി സ്വാതന്ത്ര്യം
ബാക്കിയുള്ളതെത്ര ഭാഗ്യം.


29.10.10

അവള്‍

രാത്രി
മുഖം വികൃതമായ
മന്തുകാലന്‍.
പടിയിറങ്ങിയ പകലിനെ
തെറിപറഞ്ഞു
കയറി വന്ന ജാരവര്‍ത്തകന്‍.
പൊള്ളിയ ചുണ്ടില്‍
വ്രണമണമുള്ള ചോര.
നീട്ടിത്തുപ്പിയ താംബൂലത്തില്‍
വീണുപിടഞ്ഞു തിങ്കള്‍
അവള്
രാത്രി,
മുടി കോതിയൊതുക്കണം
കനവുകളൊന്നായ്
കഴുകിയുണക്കണം
നാലും കുൂട്ടി മുറുക്കണം
തെറിവാക്കുകള്‍ക്കോടാമ്പലിടണം
തേടിവരുന്ന വാഹനത്തില്‍
മിണ്ടാതെ കേറിയിരിക്കണം
പുളിച്ച തമാശകള്‍ക്കുമ്മ കൊടുക്കണം
അയലത്തെ ജാലകച്ചില്ലയില്‍
ചാരക്കണ്ണുകള്‍,വാവല്‍ക്കൂട്ടങ്ങള്‍

ഇനി ഞാന്‍ അതിരുകളെഴുതാത്ത
ഉത്‌സവപ്പറമ്പാണ്്,
ബീഡിക്കുറ്റികള്‍,
ചര്‍ദ്ദിപ്പറ്റുകള്‍ വീണുകിടക്കും
തറനിലമാണ്
തെറികള്‍ പാടിത്തച്ചു തിമര്‍ക്കും
തിമിലകളാണ്, തംബുരുവാണ്
കനവുകളെല്ലാം ചുട്ടുകരിക്കും
ചിതയുടെ ചാരക്കുഴികളുമാണ്്്
ചിന്തകള്‍ തിന്നു മലച്ച
ചിലന്തികളന്തിയുറങ്ങും
വന്ധ്യ ജലാശയമാണ്.
വറ്റിയ പുഴകള്‍ പോലെ,
കത്തിയ കാടുകള്‍ പോലെ,
ചൂടും ദാഹവുമൊന്നായ്
പെറ്റു കിടക്കും
നാഭിക്കിണറുകളാണ്.

ദിനകരന്‍ കൊമ്പിലാത്ത്
10.10.10

കരിക്കട്ട
കരഞ്ഞു കരഞ്ഞു തളര്‍ന്നപ്പോള്‍
കറുത്തവനൊരു
കഷണം കല്‍ക്കണ്ടം കിട്ടി
ചിരിച്ച് ചരിച്ചെഴുന്നേറ്റപ്പോള്‍
കറുത്തവനൊരു
കഷണം കരിക്കട്ട കിട്ടി
വീണ്ടും കരഞ്ഞു
കരഞ്ഞു തളര്‍ന്നപ്പോള്‍
കറുത്തവനൊരു
കഷണം കല്‍ക്കണ്ടം കിട്ടി
ചുവന്നലറിയെഴുന്നേറ്റപ്പോള്‍
കറുത്തവവനൊരു
കീറ്്് തണുത്ത രാത്രി കിട്ടി.
വെളിച്ചത്തിനായലറി
മുഖം കറുത്തപ്പോള്‍
കറുത്തവന് കിട്ടി
കൈക്കുടന്ന നിറയെ തീപ്പൊട്ടുകള്‍
രോഷം പുകഞ്ഞു കാട്ടുതീ്
കലങ്ങിയപ്പോള്‍
കറുത്തവന്‍ വെറുമൊരു കരിക്കട്ട.
കൊടും തീയ്യില്‍ ചുട്ടെടുത്ത
കാട്ടു വിത്തുപോല്‍
കറുത്തവന്‍
വെറുമൊരു കരിക്കട്ട

മുലപ്പാല്‍

മഞ്ഞിന്റെ വെളുത്ത ആകാശം
പുകയുന്ന തീനാഗം പോലെ
തണുപ്പിന്റെ തോടിളക്കാതെ
തീവണ്ടി ഓടുന്നു.
വളവില്‍ തണുത്ത പാളത്തില്‍
കിടന്ന് കുഞ്ഞിന് മുല കൊടുക്കുന്നൊരമ്മ
കടലിരമ്പത്തിലെ
കിളിയൊച്ച പോലൊരു നിലവിളി
കേട്ടുവോ?
തണുപ്പിന്റെ തോടിളക്കാതെ
തീവണ്ടിയോടുന്നു.
അമ്മയുടെ ചുണ്ടിലൊരു
ചോരത്തുള്ളി
കുഞ്ഞിന്റെ
ചുണ്ടിലൊരമ്മിഞ്ഞത്തുള്ളി

പെണ്ണു കാണല്‍

സത്യസന്ധനായിരുന്നു ഞാന്‍
എല്ലാ മുന്‍കരുതലും ഞാന്‍ എന്നും
എടുക്കുമായിരുന്നു.
എം. കോം. ബിരുദവും
സാമാന്യം സമ്പത്തും എനിക്കുണ്ട്
എല്ലാ പ്രവൃത്തികള്‍്ക്കും
രേഖകള്‍ വേണമെന്ന് എനിക്ക്
നിര്‍ബന്ധമായിരുന്നു.
പെണ്ണു കാണാന്‍ പോകുമ്പോള്‍
ഞാന്‍ ഇന്‍ഷ്വറന്‍സ് ഏജന്റിനെയും
കൂട്ടിയിരുന്നു.
അവളെ കണ്ടയുടനെ എനിക്ക് ബോധിച്ചു.
പക്ഷെ എല്ലാം ഞാന്‍ വിദേശ ഇന്‍ഷ്വറന്‍സ്
ഏജന്റിനെ ഏല്‍പ്പിച്ചിരുന്നു.
അയാളായിരുന്നു അവളെ അളന്നത്
മുലയുടെ ഉയരം .നിതംബത്തിന്റെ ആകൃതി.
നാഭിയുടെ പരപ്പ് എല്ലാം അയാള്‍
കിറുകൃത്യമായി അളന്നെഴുതി്.
ഭയന്നു പോയ അമ്മയോട്
പ്രീമിയം സ്തീധത്തില്‍ കുറക്കാമെന്ന്
ഏജന്റ് ഉറപ്പു കൊടുത്തു
അതിനും ഒരു രേഖ വേണമെന്ന്
ഞാന്‍ സത്യസന്ധമായി പറഞ്ഞു
അവള്‍ക്കും അത് സ്വീകാര്യമായിരുന്നു.

ഫിസ്റ്റുല
കാശ്മീരിന്റെ മാപ്പു പോലെ
ഉടുമുണ്ടില്‍ ചോരപ്പാടുകള്‍
മലമടക്കുകളില്‍ എരിവും പുകച്ചിലും
ചോരച്ചളിയും ദുസ്സഹാസ്വാസ്ഥ്യവും
വരണ്ട മണ്ണിലെ നേരിയ മഴച്ചാറ്റല്‍
പോലെ ചോരപ്പകര്‍ച്ച.
ഇടക്ക് കടുത്ത കാലവര്‍ഷം പോലെ
പൊട്ടിയൊഴുകുന്ന ചോരച്ചാലുകള്‍
ഉത്തരേന്ത്യന്‍ തെരുവു
പോലെയഴുക്ക്പിടിച്ചയടിവാരങ്ങള്‍.

കാശ്മീരിന്റെ മാപ്പു പോലെ
ഉടുമുണ്ടില്‍ ചോരപ്പാടുകള്‍...
ആരോ മലയടിവാരങ്ങളില്‍ തീര്‍ത്തു
സമാന്തര തുരങ്കങ്ങള്‍
അവിടെ പച്ചനിറമുള്ള പഴുപ്പോ
ചീനപ്പകയുടെ പുകച്ചുരുളോ
രാജരഥ്യകളില്‍ ഭയകൗടില്യത്തിന്റെ
തുരഗവേഗങ്ങള്‍, കുളമ്പടിയൊച്ചകള്‍
പക വീണു വെളുത്തു തണുത്ത
ഹിമ നിടിലങ്ങളില്‍
ചോര പുരണ് കിടക്കും
വെള്ളി നിലാവ് പോലൊരു
വെള്ളപ്പിറാവ് കുറുകുന്നു.

ആദ്യരാത്രി

നീല നിറമുള്ള മഴയാണ്
മലഞ്ചെരിവില്‍ പെയ്യുന്നത്
ശബ്ദം കുറഞ്ഞ ഇടിനാദത്തിന്
പച്ച വെളിച്ചം
ശ്മശാനത്തിലെ തീക്കട്ടപോലെ
മിന്നലിനും ചാരം പുരണ്ട വെളിച്ചം
കൂട്ട നിശ്വാസത്തിന്റെ
തേങ്ങലുകളാണ് മഴക്ക്
വെടിയുപ്പിന്റെ രുചിയാണ്്
മഴവെള്ളത്തിനാകെ.
മലയുടെ മലദ്വാരങ്ങളില്‍
ദൈവ വിഗ്രഹങ്ങള്‍
മഴനനയാതെകിടന്നു.
തണുപ്പില്‍ നനഞ്ഞ മണ്ണില്‍
ശാപം പൊതിഞ്ഞ വിത്തുകള്‍
കണ്‍മിഴിച്ചു.
ജീവന്റെ സ്പന്ദനങ്ങള്‍ തോറ്റുപോയ
ആണവ ശൈത്യത്തിന്റെ ആദ്യരാത്രി.
മണ്ണില്‍ വിരിഞ്ഞ കുഞ്ഞു
തമോഗര്‍ത്തങ്ങളില്‍
വേദങ്ങള്‍ ചത്തുമലച്ച
ഗൗളികളെപ്പോലെ
വെള്ള വയര്‍കാട്ടി പൊന്തിക്കിടന്നു.
ജീവന്റെ നാദം നിലച്ച
ആണവ ശൈത്യത്തിന്റെ ആദ്യരാത്രി.
ഒടുക്കമൊരു കിളിനാദമെവിടെയോ കേട്ടോ
കരിനാഗത്തിന്റെ കടിച്ചു പിടിച്ച
കടവായില്‍നിന്നും
ഒടുക്കമൊരു കിളിനാദമെവിടേയോ കേട്ടോ.....

വഴി

വഴി

ആദ്യം എനിക്ക് വഴികാട്ടിത്തന്നത്
ഒരു വെളുത്ത നിറമുള്ള ജാരന്‍
അവന്‍ പറഞ്ഞു തന്ന വഴികളില്‍
ഗന്ധകത്തിന്റെ രൂക്ഷ മണം അലയിടിച്ചു.

രണ്ടാമത്തെയാള്‍ കണ്ണു പൊട്ടനായ
ഒരു വൃദ്ധനായിരുന്നു
തടവില്‍ കിടക്കുന്ന കാലമാണ്
സഹതടവുകാര്‍ അയാളുടെ
കണ്ണു കുത്തിപ്പൊട്ടിച്ചത.്
ഉറങ്ങുമ്പോള്‍ കണ്ണില്‍ ചിരവത്തണ്ട്
കയറ്റിയയാള്‍ക്ക് പിന്നീട്
നിരന്തരം പരോളും ഒടുക്കം
ജയില്‍ മോചനവുമായി
എനിക്ക് ജയിലിലേക്കാണ്
വൃദ്ധന്‍ വഴികാട്ടിത്തന്നത്.
ചിരവത്തണ്ട് കയറിയ കണ്ണ്
വൃത്തികെട്ട മരപ്പൊത്ത് പോലെ
വികൃതമായിരുന്നു.
നീ പോകേണ്ടത് അവിടെത്തന്നെയാണ്

മൂന്നാമത്തെയാള്‍
കിണറു കുഴിക്കുമ്പോള്‍
കിണറ്റില്‍ വീണു മരിച്ച ഒരു
കമ്മ്യൃണിസ്റ്റുകാരന്റെ ആത്മാവായിരുന്നു.
അയാള്‍ കാണിച്ച വഴി
മുഴക്കം മുറിവേല്‍പ്പിക്കുന്ന
അന്ധകൂപത്തിലേക്കായിരുന്നു.
പ്രേതങ്ങളുടെ നിഴലുകള്‍ നീരാടുന്ന
ജലതലങ്ങള്‍.............
ഒരു കൈ നിട്ടിയപ്പോള്‍ ആയിരം
തണുത്ത കൈകള്‍.
ഒടുക്കം
എല്ലാ വഴികളും കറുത്ത
കിണറ്റിലേക്കാണെന്നു ഞാന്‍
തിരിച്ചറിഞ്ഞു
തണുപ്പില്‍ തുളച്ച്് തരിച്ചറിഞ്ഞു.

ചിത്രം

നീ ഇപ്പോള്‍ വരക്കുന്ന
ചിത്രങ്ങള്‍ എല്ലാം എന്നെ പേടിപ്പിക്കുന്നു
എന്തൊക്കെയാണി വരച്ചു കൂട്ടുന്നത്
വെട്ടിയെടുത്ത പശുവിന്റെ തല,
അര്‍ശസ്സു ബാധിച്ച മലദ്വാരം,
ഒരു കണ്ണു മാത്രമുള്ള ബുദ്ധ പ്രതിമ,
സ്പരിട്ടില്‍ സൂക്ഷിച്ച കൈപ്പത്തി,
തലയോട്ടി കൊണ്ടുണ്ടാക്കിയ
പാത്രത്തില്‍ കൊക്കോക്കോളയും
വലിച്ചു കുടിക്കാനുള്ള മഞ്ഞ സ്രേ്ടാവും.

പെണ്‍കുട്ടീ നീ വരക്കുന്ന ചിത്രങ്ങള്‍
എന്നെ വല്ലാതെ പേടിപ്പിക്കുന്നു.
നിന്റെ ചിത്രങ്ങള്‍ക്ക് എന്തിനിത്ര
കടുംചായക്കൂട്ടുകള്‍
നീ വരച്ച ഉപ്പു തരികള്‍ക്ക് വെളുപ്പാണ്
പക്ഷെ നീ എന്തിന് അതില്‍
കടും ചുവപ്പാര്‍ന്ന ചോരയൊഴിച്ചു?
ചോരയിലെ ലാവണ്യമാണ് എനിക്ക് വേണ്ടത്
ചോരയിലെ ലവണമല്ല.

ചില ചിത്രങ്ങള്‍ എന്താണെന്ന്
മനസ്സിലാവുന്നേയില്ല
പൂക്കൂടകളില്‍ പറ്റിച്ചേര്‍ന്നു കിടക്കുന്ന
ചെന്നായുടെ ഒരു കണ്ണ്
ചോര പുരണ്ട ആ കണ്ണ് എന്നെ
ചിത്രത്തില്‍ നിന്നും തുറിച്ചു നോക്കുന്നു.
നഗ്‌ന സന്യാസിയുടെ
പൂജാ പാത്രത്തിനടുത്ത്
എന്തിനാണ് നീ പാദസരമിട്ട ഒരു
പെണ്‍കുട്ടിയുടെ കണങ്കാല്‍ വരച്ചു ചേര്‍ത്തത്?
ആണ്‍ കുട്ടിയെ കുളിപ്പിക്കുന്ന അമ്മയുടെ
കണ്ണില്‍ ആരെങ്കിലും പേടി വരച്ചു ചേര്‍ക്കുമോ
നിനക്ക് ഭാവന തീരെയില്ല.

നിന്റെ എല്ലാ മനോഹര ശലഭങ്ങളുടെ
മുഖങ്ങളിലും കൂര്‍ത്ത കൊതുകിന്റെ
കൊമ്പുകളാണ് വരച്ചു ചേര്‍ത്തിരിക്കുന്നത്
ഒട്ടും ചേരുന്നില്ല.
'മാര്‍ക്കറ്റ്്' എന്നു പേരിട്ട ഒരു ചിത്രത്തില്‍
എന്തിനാണ് നിന്റെ നഗ്‌നത വരച്ചു ചേര്‍ത്തത്
ഉപ്പു മാങ്ങാ ഭരണിയില്‍ നി എന്തിനാണ്
ചത്ത വിഷപ്പാമ്പിനെ വരച്ചു ചേര്‍ത്തത്

ചിത്രങ്ങള്‍ വരക്കാനറിയില്ലെങ്കില്‍
ദയവ് ചെയ്ത് ബ്രഷ്് എടുക്കരുത്
പേടി കൊണ്ട് ചായം കൊടുക്കരുത്
പേടിയുടെ നിറം മഞ്ഞയാണ്
അതു കാണുമ്പോള്‍ ഞാന്‍ വിളറി്േപ്പാകും

ദിനകരന്‍ കൊമ്പിലാത്ത്‌

തീവണ്ടി

കുതിച്ച് കിതച്ച് ചിരിച്ച് കരഞ്ഞ്
തുടുത്ത് മടുത്ത് വിളര്‍ത്ത്്്്്്്്്്്്്്്
കരിഞ്ഞ്്് പുകഞ്ഞ്്് പഴുത്ത്്് വിങ്ങി
എരീഞ്ഞുരഞ്ഞ്്് നിരങ്ങി നിരങ്ങിയെത്തി
പഴയ പഴയ പാവം പാസഞ്ചര്‍

ഒരു മരണം കാണാന്‍

ഒരു മരണം കാണാന്‍ കണ്ണൂരിലേക്ക്
പോവുകയാണ്
ഒരുക്കങ്ങളെല്ലാമായി
കീശയില്‍ കറുത്തതുണിയുണ്ട്
കംപോസ് ചെയ്ത അനുശോചനക്കുറിപ്പുണ്ട്
കരയാന്‍ ഉറുമാലില്‍ പൊതിഞ്ഞെടുത്ത
ഒരു കഷണം സവാളയുണ്ട്
അംഗരക്ഷകര്‍ ഉണ്ട്
അത്യാവശ്യത്തിന് ആയുധങ്ങളുമുണ്ട്
തിരിച്ചടിക്കുള്ള കോപ്പും കരുതിയിട്ടുണ്ട്
ഒരു മരണം കാണാന്‍
കണ്ണൂരിലേക്ക് പോവുകയാണ്
ഡയറിയുണ്ട് കൈയ്യില്‍
നിറയെ കണക്കുകളുണ്ട്
പേജുകളാകെ തീര്‍ന്നു
എണ്ണമെത്രയെന്നോര്‍മ്മയില്ല
വെട്ടിയും കുത്തിക്കീറിയും ചോര
തെറിച്ച പേജുകള്‍
ആദ്യമാരാണ് കത്തി്ക്കിരയായതെന്ന്
പ്രത്യേകം കുറിച്ചു വെച്ചിട്ടുണ്ട്
പ്രസംഗത്തിലാത്യാവശ്യമാണിക്കാര്യം
എഴുതാന്‍ പറ്റാത്ത കഥയുമുണ്ട്
വെട്ടേറ്റു മരിച്ചവന്റെ ഭാര്യ
മാംസം വിറ്റു കുഞ്ഞിനെ പോറ്റിയ കഥ
തെറ്റു ചെയ്തവളെ
പുറത്താക്കിയിട്ടുണ്ട്.
മാഹിയിലെത്തി, ശക്തിയില്ല മനസ്സിന്
മാടിവിളിക്കുന്നു
മയക്കം പൊതിഞ്ഞ ശബള കാന്തികള്‍
ഇത്തിരിയാവാം, ഒത്തിരി
ധൈര്യവുമാവാം
കഷ്ടകാലമാണ് കണ്ണാടി താഴ്തിയിടാം
കാറിനിത്തിരി വേഗത കുറച്ച്
പോകാം
എത്തി വിലാപയാത്രയുടെ കത്തിയ മണം
ദുഷ്ട വിചാരങ്ങള്‍ പടി കേറി വരുന്നു.
തപ്പി നോക്കി വാളുകളുണ്ട് വണ്ടിയില്‍
ഡിക്കിയിലുണ്ട് കൊച്ചു ബോംബുകള്‍
ഒരു മരണം കാണാന്‍
കണ്ണൂരിലേക്ക്പോവുകയാണ്.
ഒരു മരണം കാണാന്‍ കണ്ണൂരിലേക്ക്
പോവുകയാണ്.

എല്ലുകള്‍

എല്ലുകള്‍

ഒന്നാം കള്ാസിലെ കുട്ടി വരച്ചത്
പട്ടിയുടെ ചിത്രമായിരുന്നു
എല്ലിന്‍ കഷണങ്ങള്‍ കൂടി വരക്കാന്‍
ടീച്ചര്‍ പറഞ്ഞു
ചിത്രം വരക്കാനാകാത്തതിനാല്‍
കുട്ടി എല്ലിന്‍ കഷണങ്ങള്‍തന്നെയാണ്്
സ്‌കൂളിലേക്ക് കൊണ്ടു പോയത്
യുദ്ധത്തില്‍ കൊല്ലപ്പെട്ട അപ്പൂപ്പന്റെയ
സ്ഥിത്തറ പൊളിച്ചാണ്
അമ്മ എല്ലെടുത്തു കൊടുത്തത.
തലയോടിന്റെ ഒരു ചെറു കഷണമായിരുതു അത്
കുട്ടിയുടെ ബാഗിലെ
ചിത്രത്തില്‍ നിന്നും പട്ടി കുരച്ചു
ബാഗില്‍ എല്ലുകള്‍ കടിച്ചു പൊട്ടിക്കുന്ന
ശബ്ദം കുട്ടി പേടിയോടെ
കേട്ടു കൊണ്ടിരുന്നു.

കൊഴുക്കട്ട

കൊഴുക്കട്ടയാണവനേറെയിഷ്‌ടം
അടുക്കളയില്‍ വെല്ലം ചേര്‍ത്തു
മാവ്‌ കുഴക്കുകയാണമ്മ.
മെല്ലിച്ച വിരലുകളില്‍ സേ്‌നഹം
ചേര്‍ത്തമര്‍ത്തിക്കുഴച്ചുരുട്ടിയുരുട്ടി...

മുകളിലെ മുറിയില്‍ മകന്‍
മുനയുള്ള കല്ലുകള്‍ ചേര്‍ത്ത്‌
വെടിമരുന്നു കുഴച്ചീടുന്നിരുളില്‍,
വെന്ത പുന്നെല്ലിന്റെ മണമായിരുന്നു
അമ്മയുടെ കൊഴുക്കട്ടക്ക്‌
കരിഞ്ഞ മുടിയുടെ മണമാണ്‌
മകന്റെ മുറിയാകെ....

കൊഴുക്കട്ടയാണവനേറെയിഷ്‌്‌ടം
ഇടക്കേതോ കാലം മൗനിയായി
ചിരി മറന്ന മകനെചിരിപ്പിക്കാന്‍
പഞ്ചസാരയും നാളികേരവുമേറെച്ചേര്‍ത്ത്‌
വേവിച്ചെടുത്ത്‌ വേറെയും കൊഴുക്കട്ടയേറെ
ചാര നിറവും വെടിയുപ്പിന്റെ രുചിയുമാണ്‌
മകന്റെ മുറിയിലെയപ്പത്തിന്‌.

കല്ലുവെച്ച മൗനവും കല്ലിച്ച മനവും
നേഞ്ചിടിപ്പേറെ വിതച്ചമ്മയില്‍
വേവും മനസ്സുപോലാവിത്തട്ടില്‍
വീണു കുതിര്‍ന്നൂ കണ്ണീരിന്നുപ്പു കണം
കന.ം കുറഞ്ഞ കുളമ്പടിയൊച്ച പോല്‍
വീടാകെ നെഞ്ചിടിപ്പോടിപ്പടരുന്നു.

ഒടുക്കമെല്ലാ നെഞ്ചിടിപ്പൊരൊറ്റ
ശബ്ദമായ,്‌ വീടാകെ വെന്തു മലര്‍ന്നു പോയ,്‌്‌്‌
ചോരയും പഞ്ചാരയും ചാരം
പുതപ്പിച്ച കൂറ്റന്‍ കൊഴുക്കട്ട പോലെ
പൊട്ടി ത്തെറിച്ച കൊഴുക്കട്ടയില്‍
ഒട്ടിപ്പിടിച്ചിരിക്കുന്നു ചിരവിയ
തേങ്ങ പോല്‍ നിലവിളിപ്പറ്റുകള്‍

ദിനകരന്‍ കൊമ്പിലാത്ത്‌്‌

ചുംബനം

മരിക്കുന്നതിന് മുന്‍പ്അയാളെ കാണാന്‍ എത്തിയത്
ഒരു ശാസ്ര്തജ്ഞനുംപിന്നെ ജര ബാധിച്ച കവിയും.
മരണം അടുത്തെത്തിയപ്പോള്‍അയാള്‍ ശാസ്ര്തജഞനോട്
ചോദിച്ചുഉപയോഗിക്കാത്ത പ്രണയം എന്നില്‍ ബാക്കിയുണ്ട്

സൂക്ഷിച്ചു വെക്കാന്‍ ഒരു മെമ്മറി കാര്‍ഡ് കിട്ടുമോ?
'നീയില്ലാതെ നിന്റെ പ്രണയം ആര്‍ക്കു വേണം'ശാസ്ര്തജഞന്‍
ചോദിച്ചു.പ്രണയം സൂക്ഷിക്കുന്ന മെമ്മറി കാര്‍ഡില്ല.
കവി ഇടക്കു കയറി പറഞ്ഞു.നിന്റെ പ്രണയം
ഒരപ്പൂപ്പന്‍താടിയിലാവാഹിച്ച്തരൂ, കാറ്റിലും
കാട്ടിലും കടലിലുംകരയിലും നിന്റെ പ്രണയം
ആടിയുലഞ്ഞു നടക്കട്ടെഎങ്കില്‍ എന്റെ പ്രണയം
കൂടി എടുത്തു കൊള്‍ക.ശാസ്ര്തജ്ഞന്‍ പ്രതീക്ഷയോടെ പറഞ്ഞു.

റീത്ത്‌ വില്‍പ്പനക്കാരന്‍

ഓരോ മരണ്‌വും നിറമുള്ള പൂവുകളാണ്‌
ഓരോ മരണവും ഒരു പൂക്കളമാണ്‌
കരയാനും നടുങ്ങാനുമുള്ളതല്ല മരണം
വിരിയാനും വില്‍ക്കാനുമുള്ളതാണ്‌

പൂവുകള്‍ക്കെല്ലാം ഒരേ നിറം,
മുല്ലയും കനകാംബരവും
ചെത്തിയും ജമന്തിയും
മരണത്തിന്റെ മണം മാത്രം.
വെട്ടേറ്റവന്‍, വെടിയേറ്റവന്‍
സഖാവോ സംഘപരിവാറോ
മതാന്ധനോ. മതേതരനോ
പെണ്ണോ പുരുഷനോ,
പുവുകള്‍ക്കെന്തു വ്യത്യാസം.

KASHAYAM

ആ ഔഷധക്കടയില്‍ പുതിയൊരു കഷായം വന്നിരിക്കുന്നു.

ക്യൂ നിന്നാല്‍ മാത്രം കിട്ടുംകഷായം അത്രമേല്‍ പ്രിയം.

നേരിയ കയ്‌പും ഇത്തിരി പൂളിപ്പുംഇത്തിരി

മധുരവമി ജൈവദ്രാവകകഷായത്തിന്‍

പ്രത്യേകതപേരിനുമു ണ്ടൊരു ശേല്‌

ഗാന്ധിക്കഷായം.ഗുണമേറെ,

ഒട്ടൊരു കഷ്‌ടം വില തുച്ഛമല്ല.

സായിപ്പന്‍മാരും മദാമ്മമാരുമാണ്‌.

ക്യൂവിലേറെക്കാത്തിരിക്കുന്നത്‌ഇത്തിരിയേ

കഴിക്കേണ്ടൂ...സത്യം ധര്‍മ്മം നീതി എന്നിവതാനേ വരുമത്രെ.

കുട്ടികള്‍ക്കേറെയുത്തമംചൊട്ടയിലേ ശീലമായി മാറുംസത്യവും

ധര്‍മ്മവുംനേതാക്കന്‍മാരേറെയുണ്ട്‌്‌്‌

പ്രിയം മതേതരത്വംകമ്മ്യണിസ്റ്റുകാര്‍ ഒളിഞ്ഞും തെളിഞ്ഞും

വരുന്നുഹിംസമാറ്റിയഹിംസയാക്കാന്‍.

ദിനകരന്‍ കൊമ്പിലാത്ത്‌.24.5.2010?

RATHRI

വിലക്ക്‌ വാങ്ങിയ ഒരു കഷണം കറുത്ത തുണിയാണ്‌ രാത്രി

പകുത്തു കൊടുത്ത ഒരു ഗ്‌ളാസ്‌പകയാണ്‌ രാത്രി

കരഞ്ഞ്‌ വീര്‍ത്ത്‌ ചുവന്നകവിളുകളാണ്‌ രാത്രി

പനിച്ച്‌ വെന്ത പകല്‍ കിനാവാണ്‌ രാത്രി

തളര്‍ന്ന്‌ വീണ രതിക്ഷീണമാണ്‌ രാത്രി

കൊടുത്തു തീര്‍ക്കാത്ത കടമാണ്‌ രാത്രി

ഒഴിഞ്ഞു മാറുന്ന മനമാണ്‌ രാത്രി

അഴിച്ചെടുത്തു ചുരുട്ടിയൊളിപ്പിച്ചകയറാണ്‌ രാത്രി

പിടിച്ചു നില്‍ക്കാത്ത നിലവിളിയാണ്‌ രാത്രി

ഇരുട്ടില്‍ വിളിച്ചുണര്‍ത്തുന്നഞെട്ടലാണ്‌ രാത്രി

അപഥ സഞ്ചാരത്തിന്റെ ശിക്ഷയാണ്‌ രാത്രി

കൊഴുത്ത മഴയുടെ ശല്യമാണ്‌ രാത്രി

പുളിച്ച തെറിയുടെ തിളച്ച വെള്ളമാണ്‌ രാത്രി

നികൃഷ്ട ശാപത്തിന്റെയശക്‌ത ശോകമാണ്‌ രാത്രി

ദിനകരന്‍ കൊമ്പിലാത്ത്‌24.5.2010.